孫中山先生 救國方針 (粵語演講) 1924年5月30日 廣州 南堤小憩 Dr Sun Yat-sen: Policy of Country Salvation (Speech in Catonese) 30th May 1924 in Guangzhou, China
我們不是要復仇，我們是要正義。
孫中山先生 救國方針 (粵語演講)
1924年5月30日 廣州 南堤小憩 Dr Sun Yat-sen: Policy of Country Salvation (Speech in Catonese) 30th May 1924 in Guangzhou, China
孫中山先生應上海《中國晚報》邀請， 於1924年5月30日於廣州南堤小憩灌錄演講錄音唱片， 此粵語演講題為《救國方針》。
. . . . .
(粵語演講)
上海《中國晚報》請孫大元帥演講
喂， 我哋大家係中國人， 我哋知道中國幾千年來係世界上頂富頂強之國家， 知道唔知道呢？ 但係見到中國係乜嘢嘅情形呢？ 中國現在就變成係世界上頂貧頂弱的嘅國， 中國嘅人民出海外嘅， 就俾外國人欺負凌辱， 看不上一個人樣。
在中國內地呢， 外國對於我地嘅政府呢， 對於我地嘅國家呢亦係睇唔起。 所以， 外國就有意嚟中國來瓜分___。
後來呢， 覺得呢個瓜分呢， 係好難實行， 恐怕因為瓜分中國呢， 惹出各國會攻打自己。 所以呢， 現在各國就協同嚟商量， 要把中國嘅國事嚟共管， 大家嚟共管中國， 就係呢， 睇中國唔起， 以為中國不能自己___治中國。
諸君試想想， 喺中國幾千年來係世界一個文明嘅國家。 幾千年前中國最強盛嘅時侯時代， 就所謂千邦進貢萬國來朝， 各國都要拜中國嘅上風。 到到今日呢， 中國反為係退化， 呢個係為乜緣故呢？ 就係中國從舊滿州征服以後， 中國人就失了個國家精神。
中國亡國於滿州二百六十幾年， 中國嘅人民就喺呢二百六十多年之內就瞓著覺。 所以， 中國就政治退化、文明退化、中國工商業退化， 中國總所以到到今日就成為民窮財盡， 就變成各國睇唔起。
中國墮落到今日呢個地位， 我哋做國民嘅又有一種乜嘢嘅感覺呢？ 我哋對於國家， 第一事我哋知道我哋今日之危險， 先知道危險呢， 我哋要設法子嚟避呢個危險， 咁用乜嘢法子嚟避得呢個危險呢？ 就要大家同心協力嚟贊成革命， 用革命嘅方法、用革命嘅主義嚟救中國。 革命嘅主義係乜嘢呢？ 就係我哋嘅三民主義。 第一，就係民族主義； 第二，民權主義； 第三，民生主義， 用呢三種嘅主義呢，嚟救中國。
呢三種嘅主義呢， 我哋嘅大家要留心、要嚟考究。 咁從邊處能考究得呢個三民主義呢？ 對於呢個三民主義， 我近日在廣東高師， 每禮拜演說一次。 頭一個民族主義呢， 就演說了六個禮拜就講完； 第二個民權主義呢， 又演說了六個禮拜講完； 第三個民生主義呢， 不日再嚟演講。 現在呢個民權主義、民族主義兩種呢已經係刻書出嚟。 咁所以諸君呢， 留心呢個三民主義呢要將我呢個三民主義、呢啲演說， 要嚟留心詳細嚟讀過。
呢個三民主義呢係講得好透澈嘅， 係發揮得好精密嘅， 裡頭呢有好多新思想、好多新發明。 諸君能讀呢個三民主義呢， 就曉得用乜嘢方法嚟救國啦。
我哋能照住三民主義呢種嘅方法、呢種嘅精神， 大家同心協力嚟救國呢， 咁就中國就可以反弱為強啦、轉貧為富啦， 就可以同今日之列強嚟並駕齊驅啦！
. . . . .
Audio restoration and remastering at 32-bit 192kHz by Lifeguard, October, 2011.